Трамп: „Нема Крим, нема НАТО за Украина“ – Зеленски во Вашингтон по гаранции за безбедност

Американскиот претседател Доналд Трамп порача дека враќањето на Крим и членството на Украина во НАТО се исклучени од можен мировен договор со Русија.

„Нема враќање на Крим, даден од Обама пред 12 години без истрел, и нема влез на Украина во НАТО. Некои работи никогаш не се менуваат!“, напиша Трамп на својата платформа Truth Social.

Оваа порака доаѓа во пресрет на посетата на украинскиот претседател Володимир Зеленски на Вашингтон, каде што ќе се одржат разговори за иднината на украинската безбедност и потенцијалните гаранции од САД и Европа.

Специјалниот претставник на Трамп, Стив Виткоф, изјави дека Москва прифатила можност за „робустни безбедносни гаранции“ за Украина, иако засега не е јасно дали тие ќе бидат слични на членот 5 од НАТО, кој предвидува заедничка одбрана.

Очекувањата се средбата во Белата куќа да донесе појасни насоки околу тоа какви гаранции ќе ѝ бидат понудени на Украина и дали тие ќе бидат доволни за Киев да прифати компромис во мировниот процес.