ДУИ: Повторно атентат врз Охридскиот мировен договор
Вчерашните изјави на Максим Димитриевски против Бадентеровото мнозинство претставуваат продолжение на оркестрирана кампања на оваа влада и нејзините партнери за рушење на темелите на Охридскиот мировен договор и враќање на државата назад – во неправда и исклучување; велат од ДУИ.
„Од првиот ден на мандатот, владата ги нападна столбовите на еднаквоста:
• Го укина балансерот и го поткопа правичното претставување на Албанците и другите заедници во државните институции;
• Го девалвираше Охридскиот мировен договор доверувајќи ја неговата имплементација на Иван Стоилковиќ – личност со добро познати антиалбански и путинистички убедувања;
• На противуставен и противзаконски начин ја избриша дијаспората од пресметките, оштетувајќи го претставувањето во општинските совети во областите со албанско мнозинство;
• Ги намали Албанците во официјалните пресметки и молчеше пред отворената дискриминација;
• Го девалвираше Инспекторатот за употреба на јазиците одземајќи му го статусот на правно лице, минимизирајќи ја неговата улога и изедначувајќи го со обичен сектор во Министерството за правда;
• Ја претвори Агенцијата за примена на јазиците во нефункционална институција, без никаква реална улога, покрај тоа што Стоилковиќ ги презеде нејзините простории.
Денес, Димитриевски отвора нов фронт против Бадентеровото мнозинство – уставниот механизам што гарантира еднаквост и стабилност во државата. Не треба да се заборави дека ова е истиот политичар кој им го забрани користењето на албанското знаме на претставниците на ВРЕДИ, а денес се обидува да го релативизира Охридскиот мировен договор, нарекувајќи го „исполнет“ и „надминат“.
Ова не е случајност, ова е продолжение на програмата на ВМРО, која пред изборите отворено најави мерки против мултиетничноста и Охридскиот мировен договор. Во истата линија беше и иницијативата на ВМРО-ДПМНЕ за целосно укинување на Законот за употреба на јазиците пред Уставниот суд. Нивните денешни партнери едноставно ја спроведуваат таа агенда.
Но октомври е близу. Народот ќе зборува гласно на народниот референдум и ќе покаже дека Охридскиот мировен договор не смее да се допира, дека достоинството на Албанците не се преговара и дека секој обид за исклучување и понижување ќе биде жестоко казнет“, стои во соопштението од ДУИ.
30.08.2025 - 10:44
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
